Krónprins Dana kynnti sér Græna framtíð
Friðrik krónprins Dana heimsótti í gær margmiðlunarsýninguna Græna framtíð. Sýningin fjallar um framlag Íslands til loftslags- og orkmála. Hún gefur yfirlit yfir sögu síðustu aldar, markmið landsins til næstu áratuga og þær grænu lausnir sem í boði eru til að draga úr losun innanlands sem utan.
Krónprinsinn lét afar vel af sýningunni og taldi hana gagnlegt innlegg í samtal þjóðanna tveggja um samstarf á sviði loftslagsmála.
Með í för krónprinsins voru meðal annars Guðni Th. Jóhannesson, forseti Íslands, utanríkisráðherrar beggja landa og fulltrúar úr dönsku og íslensku viðskiptalífi. Þeir tóku þátt í fundi þar sem fjölmörg viðskiptatækifæri Íslands og Danmerkur á sviði grænna lausna voru reifuð. Ríkur vilji kom fram á fundinum um samvinnu landanna sem eru þó um margt ólík þegar kemur að orkumálum.
Ljóst er að með nýsköpun, samvinnu ríkja og nýjum grænum lausnum verður hægt að draga úr losun gróðurhúsalofttegunda á alþjóðavísu.
Græn framtíð er starfrækt af Grænvangi og Íslandsstofu og er innan veggja nýrrar skrifstofu Íslandsstofu og Grænvangs í Vatnsmýri.